మహారాష్ట్రలోని అకోలాలో ఓ నగల వ్యాపారికి చెందిన స్కూటీ డిక్కీలో నుంచి రూ. 9.50 లక్షల నగదు చోరీకి గురైన ఘటన తీవ్ర కలకలం రేపింది.
రోజంతా వ్యాపారం ముగించుకుని ఇంటికి వెళ్లే క్రమంలో, ఆ వ్యాపారి నగదును ఒక గుడ్డ సంచిలో ఉంచి స్కూటీ డిక్కీలో పెట్టారు. ఆ సంచిలో నగదుతో పాటు నగల దుకాణం లాకర్ తాళంచెవులు కూడా ఉన్నట్లు తెలిసింది. ఆ తర్వాత ఇంటి సమీపంలోని బట్టల దుకాణంలోకి ఏదో కొనుగోలు చేయడానికి వెళ్లారు.
వ్యాపారి దుకాణంలోకి వెళ్లిన వెంటనే, ఇద్దరు వ్యక్తులు స్కూటీ వద్దకు వచ్చారు. క్షణాల వ్యవధిలోనే స్కూటీ డిక్కీని తెరిచి, లోపల ఉన్న నగదు, తాళంచెవుల సంచిని తీసుకుని అక్కడి నుంచి పరారయ్యారు. ఈ చోరీ తంతు మొత్తం సమీపంలోని సీసీటీవీ కెమెరాలో స్పష్టంగా రికార్డైంది.
బాధిత వ్యాపారిని అకోలాకు చెందిన నగల వ్యాపారి పరేష్ చందులాల్ సరాఫ్‌గా గుర్తించారు. ఆయన రోజూలాగే దుకాణం మూసివేసి ఇంటికి వెళ్తూ స్కూటీ డిక్కీలో నగదు భద్రపరిచినట్లు పోలీసులు తెలిపారు. అకోలాలోని సివిల్ లైన్ ప్రాంతంలో, పోలీస్ స్టేషన్‌కు కేవలం సుమారు 1,000 గజాల దూరంలోనే ఈ చోరీ జరగడం గమనార్హం. బాధితుడి ఫిర్యాదు మేరకు సివిల్ లైన్ పోలీసులు కేసు నమోదు చేసుకున్నారు.
సీసీటీవీ దృశ్యాల ఆధారంగా నిందితులను పట్టుకునేందుకు పోలీసులు గాలింపు చర్యలు చేపట్టారు. నిందితులు వ్యాపారిని ముందు నుంచే వెంబడించారా, డిక్కీలో భారీగా నగదు ఉన్న విషయం వారికి ముందే తెలుసా, లేక అవకాశం చూసి చోరీకి పాల్పడ్డారా అనే కోణంలో దర్యాప్తు చేస్తున్నారు. ఒకవైపు రూ. 9.50 లక్షల నగదు, మరోవైపు నగల దుకాణం లాకర్ తాళాలు ఒకేసారి చోరీకి గురికావడంతో వ్యాపారి తీవ్ర దిగ్భ్రాంతికి లోనయ్యారు.