బిహార్‌లోని బంకా జిల్లాకు చెందిన ఓ పాఠశాల విద్యార్థిని.. ఎప్పటిలాగే స్కూల్‌ ముగించుకుని సైకిల్‌పై ఇంటికి తిరిగి వెళ్తోంది.
సాయంత్రం సుమారు 4 గంటల సమయంలో రజౌన్ పోలీస్‌స్టేషన్ పరిధిలోని మదీహా గ్రామ సమీపానికి చేరుకోగానే.. అప్పటికే అక్కడ మాటువేసి ఉన్న ఓ గుంపు ఆమెను అడ్డుకున్నట్లు సమాచారం.
ఆ గుంపు విద్యార్థినితో అనుచితంగా ప్రవర్తించడంతో పాటు, అసభ్య పదజాలంతో దూషించినట్లు ఆరోపణలు ఉన్నాయి. ఈ క్రమంలో బాధితురాలి బావ అయిన కుందన్ కుమార్ ఆమెను బలవంతంగా పట్టుకుని, నుదుటిపై కుంకుమ పెట్టినట్లు ఫిర్యాదులో పేర్కొన్నారు.
అంతటితో ఆగకుండా.. “నీ జీవితాన్ని నాశనం చేస్తాం” అంటూ ఆ గుంపు ఆమెను తీవ్రంగా బెదిరించినట్లు సమాచారం.
ఈ ఘటనతో తీవ్ర భయాందోళనకు గురైన విద్యార్థిని ఏడుస్తూ ఇంటికి చేరుకుని.. జరిగిన విషయాన్ని తల్లిదండ్రులకు వివరించింది.
వెంటనే బాధితురాలి తల్లి రజౌన్ పోలీస్‌స్టేషన్‌లో ఫిర్యాదు చేసింది. ఫిర్యాదు ఆధారంగా ప్రధాన నిందితుడిగా పేర్కొన్న బావ కుందన్ కుమార్‌తో పాటు రామకృష్ణ కుమార్, సాజన్ కుమార్, సమర్ కుమార్, సాహిల్ కుమార్, జ్యోతిష్ కుమార్ అనే మరో ఐదుగురిపై పోలీసులు కేసు నమోదు చేశారు.
వీరంతా భాగల్‌పూర్ జిల్లాకు చెందినవారిగా పోలీసులు గుర్తించినట్లు సమాచారం.
కేసు నమోదు చేసిన పోలీసులు ఘటనపై దర్యాప్తు ప్రారంభించారు. పరారీలో ఉన్న నిందితుల కోసం గాలింపు చేపట్టడంతో పాటు.. అందుబాటులో ఉన్న ఆధారాలు, సాక్షుల వాంగ్మూలాల ఆధారంగా తదుపరి చర్యలు తీసుకుంటున్నట్లు తెలుస్తోంది.
పాఠశాల నుంచి ఇంటికి వెళ్తున్న ఓ విద్యార్థినిని అడ్డుకుని బెదిరించిన ఘటన స్థానికంగా తీవ్ర కలకలం రేపింది.