ప్రపంచ నాయకులు “నాగరికత ప్రక్రియలో వెనక్కి వెళ్లడం” చూస్తుంటే ఆశ్చర్యంగా ఉందని ఫ్రాన్స్ అధ్యక్షుడు ఇమ్మాన్యుయేల్ మాక్రాన్ వ్యాఖ్యానించారు. ఇరువురు నేతల మధ్య జరిగిన ప్రైవేట్ సంభాషణలను (Text Messages) ట్రంప్ బహిర్గతం చేసిన నేపథ్యంలో మాక్రాన్ ఈ విధంగా స్పందించారు.
తన మూడు రోజుల భారత పర్యటనలో భాగంగా, ప్రముఖ పాడ్‌కాస్టర్ రాజ్ శమాని నిర్వహించే ‘ఫిగరింగ్ అవుట్’ కార్యక్రమంలో మాక్రాన్ పాల్గొన్నారు. ఈ సందర్భంగా భారత్-ఫ్రాన్స్ సంబంధాల నుండి ట్రంప్‌తో కొనసాగుతున్న గొడవ వరకు పలు అంశాలపై ఆయన మాట్లాడారు.
గౌరవప్రదమైన దౌత్యం: ప్రైవేట్ సందేశాల లీకేజీపై నేరుగా స్పందించనప్పటికీ, అంతర్జాతీయ సంబంధాలలో “గౌరవం” ఎంత ముఖ్యమో మాక్రాన్ నొక్కి చెప్పారు. “గౌరవం అనేది నాయకత్వంలో ఒక భాగం. మన ఆలోచనలు కలవొచ్చు, కలవకపోవచ్చు.. విభేదాలు ఉండవచ్చు, కానీ వాటిని గౌరవప్రదంగా వ్యక్తపరచాలి,” అని ఆయన అన్నారు.
“ప్రజాస్వామ్య దేశాల్లో మీ నాయకత్వాన్ని మార్చుకునే హక్కు మీకు ఉంటుంది. చట్టాలు చేసే అధికారం ఎవరికి ఇవ్వాలో మీరే నిర్ణయిస్తారు. కాబట్టి అక్కడ హింసకు లేదా అగౌరవానికి తావు లేదు,” అని ఆయన జోడించారు. అమెరికా నాయకత్వం ఏ దిశగా వెళ్తుందోనని ప్రపంచం భయపడాలా? అన్న ప్రశ్నకు.. “దశాబ్దాల కాలంగా మనం నాగరికతను, గౌరవాన్ని నిర్మించుకున్నాము. ఇప్పుడు నాయకులు వెనక్కి వెళ్లడం సరైన సందేశం కాదు,” అని సమాధానమిచ్చారు.
ట్రంప్ వర్సెస్ మాక్రాన్: అసలు గొడవ ఏమిటి? గాజా పునర్నిర్మాణం కోసం ట్రంప్ ఏర్పాటు చేసిన ‘బోర్డ్ ఆఫ్ పీస్’ (Board of Peace) లో చేరాలన్న ఆహ్వానాన్ని ఫ్రాన్స్ తిరస్కరించడంతో ఈ వివాదం మొదలైంది. గాజా మరియు ఇజ్రాయెల్-పాలస్తీనా వివాదం గురించి ఈ బోర్డు చార్టర్‌లో స్పష్టమైన ప్రస్తావన లేదని ఫ్రాన్స్ ఆందోళన వ్యక్తం చేసింది.
దీనికి ప్రతిచర్యగా, ఫ్రాన్స్ నుండి వచ్చే వైన్ మరియు షాంపైన్లపై 200% టారిఫ్ (పన్ను) విధిస్తానని ట్రంప్ హెచ్చరించారు. ఆ తర్వాత మాక్రాన్ తనకు పంపిన ప్రైవేట్ సందేశాలను తన ‘ట్రూత్ సోషల్’ వేదికగా ట్రంప్ లీక్ చేశారు. అందులో గ్రీన్లాండ్ విషయంలో అమెరికా ఆసక్తిని మాక్రాన్ ప్రశ్నించడం కనిపిస్తుంది.