హోటల్ గదిలోకి వెళ్ళగానే మనం తాజాగా ఉండే తువ్వాళ్లు, కాఫీ లేదా టీ మేకర్ వంటి సౌకర్యాలను ఆశిస్తాము. అయితే, ఒక టిక్‌టాక్ క్రియేటర్ షేర్ చేసిన వీడియో సోషల్ మీడియా వినియోగదారులను దిగ్భ్రాంతికి గురి చేస్తోంది. తన వద్ద తగినన్ని లోదుస్తులు లేనప్పుడు హోటల్ కాఫీ మెషీన్‌ను ఉపయోగించి వాటిని ఎలా ఉతకాలో ఆమె ఒక “ట్రావెల్ హ్యాక్” పేరుతో వివరించింది.
ఆ వింత పద్ధతి ఏంటంటే: ఆ ఇన్‌ఫ్లుయెన్సర్ వీడియోలో మాట్లాడుతూ.. “మీరు ప్రయాణంలో ఉన్నప్పుడు సరిపడా లోదుస్తులు తెచ్చుకోకపోతే, ప్రతి గదిలో ఉండే కాఫీ పాట్‌ను వాడుకోవచ్చు” అని చెప్పింది. కాఫీ పౌడర్ వేసే భాగంలో తన లోదుస్తులను పెట్టి, మెషీన్ ఆన్ చేసింది. “దీనివల్ల మరిగే వేడి నీరు వాటిపై పడి శుభ్రం చేస్తుంది” అని వివరిస్తూ, ఆ తర్వాత హెయిర్ డ్రైయర్ ఉపయోగించి వాటిని ఆరబెట్టుకోవచ్చని సూచించింది. ఇది తన ఫ్రెండ్ అయిన ఒక ఫ్లైట్ అటెండెంట్ నుండి నేర్చుకున్న పాత ట్రిక్ అని ఆమె చెప్పుకొచ్చింది.
నెటిజన్ల ఆగ్రహం: ఈ వీడియో వైరల్ కావడంతో నెటిజన్లు తీవ్రంగా విమర్శిస్తున్నారు.
- “సింక్‌లో వేడి నీళ్లు పోసి ఉతకవచ్చు కదా? ఇలాంటి పిచ్చి పనుల వల్ల తర్వాత వచ్చే అతిథుల ఆరోగ్యం ఏమవ్వాలి?” అని ఒకరు ప్రశ్నించారు.
- “ఇది చాలా అసహ్యకరమైన పని. హోటల్ గదుల్లో వస్తువులను అందరూ వాడుకుంటారని కనీస బాధ్యత ఉండాలి” అని మరికొందరు మండిపడుతున్నారు.
- “హోటల్స్ వారు ఈ మెషీన్లను ప్రతిసారీ లోతుగా శుభ్రం చేయరు, ఇలాంటివి విన్న తర్వాత ఇకపై హోటల్ కాఫీ తాగాలంటేనే భయమేస్తోంది” అని నెటిజన్లు ఆవేదన వ్యక్తం చేస్తున్నారు.