న్యూఢిల్లీ: ఇరాన్ యుద్ధం కారణంగా ముడి చమురు కొరతను ఎదుర్కొంటున్న భారత్‌కు మరో చేదు వార్త అందింది. రష్యన్ చమురు సంస్థ భాగస్వామ్యం ఉన్న నయారా ఎనర్జీ (Nayara Energy) తన చమురు శుద్ధి ప్లాంట్‌ను 35 రోజుల పాటు మూసివేయనుంది.
వార్షిక మరమ్మతుల (Maintenance) నిమిత్తం ఏప్రిల్ మొదటి వారం నుండి ఈ ప్లాంట్‌ను మూసివేస్తున్నారు. దీనివల్ల దేశంలోని మొత్తం ముడి చమురు శుద్ధి సామర్థ్యంలో సుమారు ఎనిమిది శాతం తగ్గుదల ఉంటుందని అంచనా. ప్రస్తుత పరిస్థితుల్లో ఇది ఇంధన సంక్షోభానికి దారితీస్తుందేమో అన్న ఆందోళనలు వ్యక్తమవుతున్నాయి. ఏడాదికి 20 మిలియన్ టన్నుల శుద్ధి సామర్థ్యం కలిగిన గుజరాత్‌లోని వాడినార్ రిఫైనరీని మూసివేయనున్నట్లు నివేదికలు చెబుతున్నాయి.
దేశవ్యాప్తంగా ఉన్న 7,000 నయారా బంకులతో పాటు ఇతర ప్రభుత్వ రంగ సంస్థలకు కూడా ఇక్కడి నుండే చమురు సరఫరా అవుతుంది. నిజానికి ఈ మరమ్మతులు గత ఏడాదే జరగాల్సి ఉంది. కానీ రష్యాపై యూరోపియన్ దేశాల ఆంక్షల కారణంగా ఇది వాయిదా పడింది. ఈ మరమ్మతు పనుల్లో కొన్ని యూరోపియన్ కంపెనీల భాగస్వామ్యం తప్పనిసరి, అయితే ఆంక్షల వల్ల అవి నిరాకరించాయి. ప్రస్తుతం రష్యాపై అమెరికా సహా ఇతర దేశాలు ఆంక్షలను సడలించడంతో, ఇప్పుడు మరమ్మతులకు అవకాశం వచ్చింది. సాధారణంగా ప్రతి నాలుగేళ్లకు ఒకసారి ఇలాంటి మెయింటెనెన్స్ పనులు జరుగుతాయి. అయితే ప్లాంట్ మూతపడినా, నయారా బంకులకు ఇంధన కొరత ఉండదని నివేదికలు పేర్కొంటున్నాయి. ఎందుకంటే అవసరమైన పెట్రోలియం ఉత్పత్తులను ఇప్పటికే భారీగా నిల్వ (Stock) చేశారు.
అయితే, ఈ రిఫైనరీ మూసివేతపై నయారా ఎనర్జీ నుండి ఇంకా అధికారిక వివరణ రావాల్సి ఉంది. నయారా ఎనర్జీలో రష్యన్ చమురు దిగ్గజం రోస్నెఫ్ట్ (Rosneft) కీలక భాగస్వామిగా ఉన్న సంగతి తెలిసిందే.