న్యూఢిల్లీ: సోషల్ మీడియా వేదికల్లో ప్రతిరోజూ రకరకాల విచిత్రమైన వీడియోలు వైరల్ అవుతుంటాయి. అయితే, కదులుతున్న రైలును ఎక్కేందుకు ఓ వ్యక్తి చేసిన అత్యంత ప్రమాదకరమైన ప్రయత్నం, అతను తృటిలో ప్రాణాపాయం నుండి తప్పించుకున్న ఒళ్లు గగుర్పొడిచే వీడియో ఒకటి ప్రస్తుతం ఇంటర్నెట్లో తీవ్ర చర్చకు దారితీసింది.
ఎక్స్ (ట్విట్టర్) వేదికగా @rabiyask2021 అనే ఖాతా ద్వారా షేర్ చేయబడి, ఇప్పటికే 18 వేలకు పైగా నెటిజన్లు వీక్షించిన ఈ వీడియోలో.. ఒక రైల్వే స్టేషన్ నుండి రైలు బయలుదేరి వేగంగా ముందుకు కదులుతోంది. ఆ సమయంలో అక్కడ నిలబడి ఉన్న ఓ ప్రయాణికుడు, కదులుతున్న రైలు బోగీ తలుపు వద్ద ఉన్న హ్యాండిల్ ను పట్టుకుని నడుస్తూ, లోపలికి ఎక్కడానికి తీవ్రంగా ప్రయత్నించాడు.
ప్లాట్ఫారమ్ గ్యాప్లో చిక్కుకున్న కాలు:
కానీ, దురదృష్టవశాత్తూ ప్లాట్ఫారమ్పై ఉన్న ఒక బ్యాగ్ (సంచి) ను అతని కాలు బలంగా ఢీకొట్టింది. దీనితో అతను ఒక్కసారిగా నియంత్రణ కోల్పోయాడు. అతని ఒక కాలు ప్లాట్ఫారమ్కు, కదులుతున్న రైలుకు మధ్య ఉన్న అత్యంత ప్రమాదకరమైన ఖాళీ ప్రదేశం (గ్యాప్) లోకి జారిపోయింది. అయితే అదృష్టవశాత్తూ, అతను రైలు హ్యాండిల్ను చాలా బలంగా పట్టుకుని ఉండటం వల్ల.. వెంటనే చాకచక్యంగా తనను తాను సంభాలించుకుని, క్షణాల వ్యవధిలో రైలు లోపలికి ఎక్కి ప్రాణాలతో బయటపడ్డాడు.
నెటిజన్ల తీవ్ర ఆగ్రహం – “ఫోటోకు దండ వేసే పరిస్థితి వచ్చేది!”
“ఇలాంటి ప్రమాదకరమైన స్టంట్లు చేసే బదులు, రైలు పోతే పోయింది అని వదిలేయవచ్చు కదా!” అని, “కొద్దిగా మిస్ అయి ఉంటే కుటుంబ సభ్యులు ఇతని ఫోటోకు దండ వేసే పరిస్థితి వచ్చేది, అసలు ప్రాణాలతో ఎందుకు ఇలా ఆడుకుంటారు?” అని ఈ నిర్లక్ష్యపు వీడియోను చూసిన నెటిజన్లు సదరు ప్రయాణికుడిపై తీవ్రస్థాయిలో మండిపడుతూ కామెంట్లు పెడుతున్నారు.