కారైకుడి: తమిళనాడులోని కారైకుడి కే.ఎం.సి. కాలనీకి చెందిన 20 సంవత్సరాల ముత్తుమారి అనే యువతి మున్సిపల్ కార్పొరేషన్లో పారిశుధ్య కార్మికురాలిగా (Sweeper) పనిచేస్తోంది. ఆమె శంకరాపురం రోజా వీధి ప్రాంతంలో విధుల్లో ఉండగా, అదే ప్రాంతానికి చెందిన రాజశేఖర్ (50) అనే వ్యక్తి ఆమెను నిరంతరం లైంగికంగా వేధిస్తూ వస్తున్నాడు.
ఆ యువతి ఇళ్ల వద్దకు వెళ్లి చెత్త సేకరిస్తున్న సమయంలో.. అతను ఆమెను వెనుక నుండి గట్టిగా పట్టుకోవడం, అసభ్యకరంగా మాట్లాడటం చేస్తూ.. “ఇంట్లోకి వచ్చి మాత్రమే చెత్త తీసుకోవాలి” అంటూ మానసికంగా, శారీరకంగా తీవ్ర టార్చర్ పెట్టేవాడు. దీనిపై సదరు యువతి రెండు నెలల క్రితమే మున్సిపల్ హెల్త్ ఆఫీసర్ మరియు శానిటేషన్ విభాగానికి ఫిర్యాదు చేసినప్పటికీ, సంబంధిత వ్యక్తి ఒక “సైకో” అంటూ అధికారులు ఎలాంటి చర్యలు తీసుకోకుండా నిర్లక్ష్యంగా వ్యవహరించి చేతులు దూలేసుకున్నారు.
చేయి పట్టి లాగడంతో రచ్చ.. పారిశుధ్య కార్మికుల సమ్మె:
ఈ నేపథ్యంలో, ఈరోజు ముత్తుమారి సమీపంలోని మరో వీధిలో చెత్త సేకరిస్తుండగా.. అక్కడికి వచ్చిన రాజశేఖర్ ఒక్కసారిగా ఆమె చేయి పట్టుకుని లాగి, మళ్లీ అనాగరికంగా ప్రవర్తించాడు. దీంతో తీవ్ర దిగ్భ్రాంతికి గురైన ఆ యువతి గట్టిగా కేకలు వేసి, తన మేస్త్రీకి సమాచారం అందించింది. వెంటనే తోటి పారిశుధ్య కార్మికులందరూ అక్కడకు చేరుకుని రాజశేఖర్తో తీవ్ర వాగ్వాదానికి దిగారు.
తమకు రక్షణ కల్పించాలని, దళిత మహిళలమైన తమను నిరంతరం లైంగికంగా వేధిస్తూ, కులం పేరుతో దూషిస్తూ అవమానిస్తున్న రాజశేఖర్పై కఠిన చర్యలు తీసుకోవాలని డిమాండ్ చేస్తూ పారిశుధ్య కార్మికులందరూ కారైకుడి నార్త్ పోలీస్ స్టేషన్లో ఫిర్యాదు చేశారు. ఈ ఘటనకు నిరసనగా కార్మికులందరూ విధులను బహిష్కరించి పెద్ద ఎత్తున పోలీస్ స్టేషన్ వద్దకు చేరుకోవడంతో ఆ ప్రాంతంలో తీవ్ర ఉద్రిక్తత, కలకలం రేగింది.
Leave a Reply