“ఎంతటి ఘోర నిర్లక్ష్యం ఇది”ఎంతటి ఘోరమైన నిర్లక్ష్యం ఇది!” భద్రతా నిబంధనలు పాటించని కూల్చివేత పనులు… ఓ యువకుడికి జరిగిన ఘోరం..!!!

ముంబై విద్యావిహార్‌ పరిధిలోని స్టేషన్ రోడ్డులో మున్సిపల్ కార్పొరేషన్ ఆధ్వర్యంలో రోడ్డు విస్తరణ, భవనాల కూల్చివేత పనులు ముమ్మరంగా సాగుతున్నాయి.

ఆ ప్రాంతంలో జేసీబీ యంత్రంతో ఒక దుకాణాన్ని కూల్చివేస్తున్న సమయంలో, పాదచారుల కోసం ఎటువంటి కనీస భద్రతా చర్యలు చేపట్టలేదని సమాచారం. అదే సమయంలో ఎస్.కె. సోమయ్య కళాశాలలో మొదటి సంవత్సరం బీకాం చదువుతున్న 17 ఏళ్ల విద్యార్థి దేవన్ జైన్, అతని బంధువు ప్రథమ్ జైన్ కళాశాల ముగించుకుని ఇంటికి తిరిగి వెళ్తున్నారు.

కూల్చివేత జరుగుతున్న ప్రాంతం గుండా వారు వెళ్తుండగా, అనుకోకుండా అక్కడున్న ఇనుప సి-ఛానల్ (C-channel) ఒకటి అకస్మాత్తుగా ఊడి వచ్చి, ఆ విద్యార్థి కుడి కంటిపై బలంగా తాకింది. ఈ ఊహించని ప్రమాదంలో తీవ్రంగా గాయపడి కిందపడిపోయిన ఆ యువకుడిని స్థానికులు వెంటనే రక్షించి, చికిత్స నిమిత్తం రాజావాడి ఆసుపత్రికి తరలించారు. ప్రస్తుతం అతనికి అక్కడ అత్యవసర చికిత్స అందుతోందని, పరిస్థితిని వైద్యులు నిరంతరం పర్యవేక్షిస్తున్నారని సమాచారం.

ఈ ఘటనపై దేవన్ జైన్ తండ్రి వినోద్ భీమ్‌రావ్ జైన్ తిలక్ నగర్ పోలీస్ స్టేషన్‌లో ఫిర్యాదు చేశారు. ఆయన ఫిర్యాదు మేరకు నిర్లక్ష్యంగా యంత్రాన్ని నడిపి ప్రమాదానికి కారణమైన 25 ఏళ్ల జేసీబీ డ్రైవర్ మెహతాబ్ మెహదీ హసన్‌పై పోలీసులు కేసు నమోదు చేశారు. ఎటువంటి ముందస్తు భద్రతా ఏర్పాట్లు చేయకుండా కూల్చివేత పనులు చేపట్టడం వల్లే ఈ ప్రమాదం జరిగిందని ప్రాథమిక విచారణలో తేలడంతో, పోలీసులు ఈ ఘటనపై ముమ్మర దర్యాప్తు చేస్తున్నారు.