విశాఖపట్నం: అక్రమ సంబంధానికి అడ్డుగా ఉందనే కారణంతో ఓ యువతిని, ఆమె ప్రియుడు తన మరో ప్రియురాలు మరియు స్నేహితుడితో కలిసి అత్యంత క్రూరంగా హత్య చేసి చెరువులో పడేసిన దిగ్భ్రాంతికర ఘటన వెలుగులోకి వచ్చింది.
పార్వతీపురం మన్యం జిల్లాలోని దుమరాడ గ్రామంలో ఉన్న ఒక చెరువు నుండి గత జూన్ 9వ తేదీన సుమారు 34 ఏళ్ల వయసున్న ఒక మహిళ మృతదేహాన్ని పోలీసులు స్వాధీనం చేసుకున్నారు. ఈ ఘటనపై కేసు నమోదు చేసి తీవ్రంగా దర్యాప్తు చేపట్టిన పోలీసులు, హత్యకు సంబంధించి ముగ్గురు నిందితులను అరెస్ట్ చేశారు.
పోలీసుల ప్రాథమిక విచారణలో, హత్యకు గురైన మహిళ పాలకొండ మండలం, పర్నా సీతాంపేట ప్రాంతానికి చెందిన ఉషారాణి (34)గా గుర్తింపు లభించింది. ఆమె గత ప్రభుత్వంలో వాలంటీర్గా పనిచేస్తున్న సమయంలో, ఆమెతో పాటు పనిచేసిన భువనేశ్వర్ అనే యువకుడితో పరిచయం ఏర్పడి, అది కాస్తా ప్రేమగా మారింది. వీరిద్దరూ తీవ్రంగా ప్రేమించుకోవడమే కాకుండా త్వరలోనే పెళ్లి చేసుకోవాలని కూడా అనుకున్నారు. అయితే, పెళ్లి ప్రస్తావన వచ్చినప్పుడే భువనేశ్వర్ అసలు రంగు బయటపడింది.
భువనేశ్వర్కు అప్పటికే స్థానిక ఆసుపత్రిలో కాంట్రాక్ట్ నర్సుగా పనిచేస్తున్న కిరుబారాణి అనే వివాహితతో అక్రమ సంబంధం ఉంది. తనను పెళ్లి చేసుకోవాలని ఉషారాణి నిరంతరం ఒత్తిడి చేయడంతో.. తన మరో ప్రియురాలు కిరుబారాణితో కలిసి జీవించాలని భువనేశ్వర్ భావించాడు. ఈ క్రమంలో ఉషారాణిని శాశ్వతంగా అడ్డుతొలగించుకోవాలని డిసైడ్ అయిన భువనేశ్వర్, తన ప్రియురాలు కిరుబారాణి మరియు స్నేహితుడైన తేజేశ్వరరావుతో కలిసి ఒక ఘోరమైన హత్య ప్లాన్ వేశాడు.
వ్యూహం ప్రకారం, గత జూన్ 6వ తేదీన ఉషారాణిని తమ కారులో ఎక్కించుకున్న ఈ ముగ్గురు, ఆమెకు మత్తుమందు కలిపిన కూల్ డ్రింక్ ఇచ్చారు. ఆమె స్పృహ తప్పి పడిపోగానే కారులోనే గొంతు నులిమి హత్య చేశారు. మొదట శ్రీకాకుళం జిల్లా ఆముదాలవలస సమీపంలోని ఒక చెరువులో శవాన్ని పడేశారు. అయితే, అక్కడ నీటి మట్టం తక్కువగా ఉండటంతో మృతదేహం పైకి కనిపించింది.
దీంతో భయాందోళనకు గురైన నిందితులు.. శవాన్ని మళ్లీ కారులోకి ఎక్కించుకుని దుమరాడ గ్రామంలోని మరో చెరువు వద్దకు తీసుకెళ్లారు. ఈసారి మృతదేహం పైకి తేలకుండా భారీ బండరాళ్లను కట్టి చెరువులోకి విసిరేసి పరారయ్యారు. జూన్ 9న మృతదేహం నీటిపై తేలడంతో సమాచారం అందుకున్న పోలీసులు వేగంగా దర్యాప్తు జరిపారు. ఈ కేసులో భువనేశ్వర్, కిరుబారాణి, తేజేశ్వరరావులను అరెస్ట్ చేయగా, వారు తమ నేరాన్ని అంగీకరించారు.
Leave a Reply