చెన్నై: సూపర్స్టార్ రజనీకాంత్ సినిమాలో అడుగుపెట్టగానే స్టార్ హీరో అయిపోలేదు. తొలినాళ్లలో నాటకాలు, ఫిల్మ్ ఇన్స్టిట్యూట్లో నటనపై శిక్షణ, ఆపై సినిమాల్లో విలన్ పాత్రలు.. ఆ తర్వాతే హీరోగా మారి నేడు తిరుగులేని సూపర్స్టార్గా ఎదిగారు. అయితే, రజనీకాంత్ను తమిళనాడులోని మారుమూల గ్రామాల్లో సైతం విపరీతంగా పాపులర్ చేసిన ఒక ఐకానిక్ క్యారెక్టర్ ఉంది. ఆ పాత్రలో నటించడానికి రజనీకి 3,000 రూపాయల రెమ్యునరేషన్ మాట్లాడి, చివరికి 500 రూపాయలు బాకీ పెట్టానని ఆ దర్శకుడే స్వయంగా ఒక ఇంటర్వ్యూలో వెల్లడించారు. ఇంతకీ ఆ దర్శకుడు ఎవరు? ఆ సినిమా ఏంటో ఇక్కడ చూద్దాం.
దీర్ఘకాలంగా కేవలం స్టూడియో సెట్టింగులకే పరిమితమైన తమిళ సినిమాను అవుట్డోర్కు, పల్లెటూరి వాతావరణానికి పరిచయం చేసిన ఘనత ‘దర్శక ఇమయం’ భారతీరాజాకే దక్కుతుంది. సంప్రదాయానికి, ఆధునికతకు మధ్య జరిగే సంఘర్షణలను కథలుగా మలిచి, ఎంతో మంది నూతన నటీనటులను పరిశ్రమకు పరిచయం చేసిన లెజెండ్ ఆయన. ఆయనే సూపర్స్టార్ రజనీకాంత్ను మాస్ ఆడియన్స్కు చేరువ చేసిన ఆ పాత్రను సృష్టించారు. భారతీరాజా దర్శకత్వం వహించిన క్లాసిక్ హిట్ చిత్రం ’16 వయదినీలే’ ( తెలుగులో ‘పదహారేళ్ళ వయసు’). ఈ చిత్రంలో రజనీకాంత్ పోషించిన విలన్ పాత్ర, ఆయన చెప్పే “ఇదు ఎప్పడి ఇరుక్కు?” (ఇది ఎలా ఉంది?) అనే డైలాగ్ ఇప్పటికీ ఎంతో ఫేమస్.
ఆ బైక్ ప్రయాణమే రజనీకి ఛాన్స్ తెచ్చింది!
ఈ సినిమాలో రజనీకాంత్ను ఎంపిక చేయడం గురించి దర్శకుడు భారతీరాజా గతంలో ఒక ఇంటర్వ్యూలో ఆసక్తికర విషయాలు పంచుకున్నారు. మొదట ఈ విలన్ పాత్ర కోసం ఒక మలయాళ నటుడిని అనుకున్నారట, కానీ కుదరలేదు.
ఆ సమయంలో ప్రసాద్ స్టూడియోలో ఒక సినిమా పూజా కార్యక్రమానికి రజనీకాంత్ వచ్చారు. ఒక మోటార్ బైక్ వెనుక సీట్లో కూర్చుని వెళ్తున్న రజనీకాంత్ జులపాలు, ఆయన హెయిర్ స్టైల్ భారతీరాజాకు విపరీతంగా నచ్చేసింది. వెంటనే రజనీని కలిసి సినిమాలో నటిస్తారా అని అడిగారు. రజనీకాంత్ ఎక్కువ డిమాండ్ చేస్తారేమోనని భావించిన భారతీరాజా.. “నేను ఒక ఆర్ట్ సినిమా తీస్తున్నాను, ఎక్కువ పారితోషికం ఇవ్వలేను” అని ముందే చెప్పారు. దానికి రజనీకాంత్ రూ.5,000 అడగగా, భారతీరాజా రూ.3,000కు ఒప్పందం కుదుర్చుకున్నారు. అయితే, ఆ మూడు వేల రూపాయలలో కూడా రూ.500 ఇవ్వకుండా బాకీ పెట్టారు. ఆ బాకీని భారతీరాజా చివరి వరకు రజనీకి ఇవ్వలేదు.
ఆ తర్వాత రజనీకాంత్ పెద్ద సూపర్స్టార్ అయినప్పటికీ.. ఎక్కడైనా ఏదైనా సినిమా వేడుకల స్టేజీపై భారతీరాజా కనిపిస్తే, “భారతి.. నా 500 రూపాయల బాకీ ఎప్పుడు ఇస్తావు?” అని సరదాగా, సరదాగా అడుగుతుండేవారని భారతీరాజా ఆ ఇంటర్వ్యూలో గుర్తుచేసుకున్నారు.
తమిళ చిత్ర పరిశ్రమ గర్వించదగ్గ లెజెండరీ దర్శకుడు భారతీరాజా గత జూన్ 10వ తేదీన అనారోగ్య కారణాలతో తన 84వ యేట కన్నుమూసిన సంగతి తెలిసిందే. ఆయన మరణానంతరం సోషల్ మీడియాలో ఆయన జ్ఞాపకాలను, పాత ఇంటర్వ్యూలను నెటిజన్లు పెద్ద ఎత్తున షేర్ చేస్తున్నారు. ఆ క్రమంలోనే ’16 వయదినీలే’ నాటి ఈ ఆసక్తికరమైన ముచ్చట ప్రస్తుతం నెట్టింట వైరల్గా మారింది.