125 రోజుల ఉపాధి పథకం: ఆంధ్రప్రదేశ్ కు 7,707.21 కోట్లు.. దేశవ్యాప్తంగా నిధుల వర్షం కురిపించిన కేంద్రం!

న్యూఢిల్లీ: కేంద్ర ప్రభుత్వం కొత్తగా ప్రవేశపెట్టిన ‘125 రోజుల ఉపాధి హామీ పథకం’ కోసం దేశవ్యాప్తంగా రూ.95,692 కోట్ల మధ్యంతర నిధులను విడుదల చేసింది. ఇందులో భాగంగా ఆంధ్రప్రదేశ్ రాష్ట్రానికి రూ. 7,707.21 కోట్లు కేటాయించినట్లు కేంద్ర వ్యవసాయ మరియు గ్రామీణాభివృద్ధి శాఖ మంత్రి శివరాజ్ సింగ్ చౌహాన్ వెల్లడించారు.

రాష్ట్రాల వారీగా నిధుల కేటాయింపులు (రూ. కోట్లలో):
మధ్యంతర నిధుల కేటాయింపులో వివిధ రాష్ట్రాలకు అందిన వాటా వివరాలు ఇలా ఉన్నాయి:

ఉత్తరప్రదేశ్: రూ. 9,721.48 కోట్లు (అత్యధిక కేటాయింపు)

పశ్చిమ బెంగాల్: రూ. 8,508 కోట్లు

ఆంధ్రప్రదేశ్: రూ. 7,707.21 కోట్లు

తమిళనాడు: రూ. 7,585.49 కోట్లు

రాజస్థాన్: రూ. 7,581.87 కోట్లు

బీహార్: రూ. 6,715.83 కోట్లు

మొత్తం నిధులలో రాష్ట్రాలకు రూ. 92,550.17 కోట్లు, కేంద్రపాలిత ప్రాంతాలకు రూ. 1,291.52 కోట్లు కేటాయించారు. ఇవి కాకుండా అడ్మినిస్ట్రేటివ్ ఖర్చులు మరియు సోషల్ ఆడిట్ కోసం మరో రూ. 1,850.62 కోట్లు కేటాయించినట్లు మంత్రి తెలిపారు. రాష్ట్రాల వాటాను కూడా కలిపితే, ఈ పథకం మొత్తం వార్షిక వ్యయం సుమారు రూ. 1.51 లక్షల కోట్లు ఉంటుందని అంచనా వేస్తున్నారు.

100 నుంచి 125 రోజులకు పెంపు
గతంలో కాంగ్రెస్ హయాంలో ప్రారంభమైన ‘మహాత్మా గాంధీ జాతీయ గ్రామీణ ఉపాధి హామీ పథకం’ (MGNREGA) లేదా 100 రోజుల పని పథకాన్ని గతేడాది బీజేపీ ప్రభుత్వం పునర్వ్యవస్థీకరించింది. దీనిని ‘వికసిత్ భారత్ గ్రామీణ ఉపాధి మరియు జీవనోపాధి హామీ పథకం’ (VP-GRAM-G) పేరుతో కొత్త చట్టంగా తీసుకువచ్చింది. ఈ కొత్త చట్టం ప్రకారం, పని దినాల సంఖ్యను 100 నుండి 125 రోజులకు పెంచడం విశేషం.

పనుల్లో జాప్యం ఉండదు: మంత్రి స్పష్టత
రాష్ట్రాల గ్రామీణాభివృద్ధి శాఖ మంత్రులతో నిర్వహించిన ఆన్‌లైన్ సమావేశంలో మంత్రి శివరాజ్ సింగ్ చౌహాన్ మాట్లాడుతూ.. “కొత్త పథకానికి సంబంధించిన నియమ నిబంధనలు ఇంకా తుది దశలో ఉన్నాయి. అయినప్పటికీ, జూన్ 30 తర్వాత కూడా గ్రామీణ ప్రాంతాల్లో పనులు ఆగిపోకూడదనే ఉద్దేశంతో ఈ మధ్యంతర నిధులను ముందే విడుదల చేస్తున్నాం. కూలీలకు ఉపాధి దొరకడంలో ఒక్క రోజు కూడా విరామం ఉండదు. కరువు వంటి అత్యవసర సమయాల్లో అదనపు పని దినాలు కల్పించే పాత పద్ధతి ఇందు లోనూ కొనసాగుతుంది” అని వివరించారు.

పశ్చిమ బెంగాల్‌కు ఊరట
కేంద్రంతో సుదీర్ఘ కాలంగా నిధుల విషయంలో ఘర్షణ పడుతున్న పశ్చిమ బెంగాల్‌కు ఇప్పుడు మోక్షం లభించింది. అక్కడ కొత్తగా ఏర్పడిన ప్రభుత్వం (బీజేపీ) కేంద్రం విధించిన నిబంధనలన్నింటికీ కట్టుబడి ఉంటామని రాతపూర్వక హామీ ఇచ్చింది. దీని ఫలితంగానే ఆ రాష్ట్రానికి కూడా నిధులను విడుదల చేసినట్లు కేంద్రం పేర్కొంది.