ఉత్తరప్రదేశ్ రాష్ట్రం సహారన్పూర్ కలెక్టరేట్ ప్రాంగణంలో శనివారం చేపట్టిన బుల్డోజర్ చర్య ప్రస్తుతం యూపీ రాజకీయాల్లో పెను దుమారాన్ని రేపుతోంది. సుమారు 16 గంటల పాటు సాగిన ఈ కూల్చివేత ప్రక్రియలో దాదాపు 70 ఏళ్ల నాటి పురాతన మసీదును అధికారులు పూర్తిగా నేలమట్టం చేశారు.
అయితే, అసలైన మలుపు కూల్చివేత పూర్తయిన తర్వాతే చోటుచేసుకుంది. ఆదివారం మసీదు ప్రాంగణంలోని శిథిలాలను తొలగిస్తున్న క్రమంలో కార్మికులకు ఓ పెద్ద కాంక్రీట్ స్లాబ్ కనిపించింది. దాన్ని కట్టింగ్ మిషన్ల సాయంతో తొలగించి చూడగా అధికారులకు ఊహించని షాక్ తగిలింది. ఆ స్లాబ్ కింద సుమారు 20 అడుగుల లోతు, 1.5 మీటర్ల వెడల్పు కలిగిన ఒక పురాతన బావి రహస్యంగా కప్పిపెట్టి ఉన్నట్లు బయటపడింది.
ఈ ఊహించని పరిణామంతో వెంటనే ఘటనా స్థలానికి చేరుకున్న సహారన్పూర్ సదర్ సబ్ డివిజనల్ మేజిస్ట్రేట్ (SDM) సుబోధ్ కుమార్, ఆ బావికి సంబంధించిన చరిత్ర, ప్రాచీనతపై పరిశోధనలు జరపాలని పురావస్తు శాఖ అధికారులకు సమాచారం అందించారు. “కోర్టు ఆదేశాల ప్రకారమే అన్ని చర్యలు చేపట్టాం, ఇప్పుడు ఈ క్రమంలోనే ఈ బావి వెలుగులోకి వచ్చింది” అని ఆయన తెలిపారు.
ఈ వ్యవహారం కేవలం పురావస్తు శాఖ అంశంతో ఆగకుండా తీవ్ర రాజకీయ రంగు పులుముకుంది. మసీదు కూల్చివేతపై సమాజ్వాదీ పార్టీ, కాంగ్రెస్, ఎంఐఎం (AIMIM) పార్టీలు తీవ్రస్థాయిలో మండిపడ్డాయి. ఈ వ్యవహారాన్ని సుప్రీంకోర్టు దృష్టికి తీసుకెళ్లనున్నట్లు కాంగ్రెస్ ఎంపీ ఇమ్రాన్ మసూద్ స్పష్టం చేశారు. మరోవైపు, “మత స్వేచ్ఛ అనేది ఎవరి దయాదాక్షిణ్యాలపైనా ఆధారపడి లేదు” అంటూ ఎంఐఎం అధినేత అసదుద్దీన్ ఒవైసీ ఆగ్రహం వ్యక్తం చేశారు.
పరిస్థితి ఉద్రిక్తంగా మారడంతో సమాజ్వాదీ పార్టీ నుంచి తీవ్ర నిరసనలు వెల్లువెత్తాయి. క్షేత్రస్థాయి పరిస్థితులను పరిశీలించేందుకు యూపీ శాసనమండలి ప్రతిపక్ష నేత లాల్ బిహారీ యాదవ్, ఎంపీలు ఇక్రా హసన్, హరేంద్ర మాలిక్ తదితర ప్రముఖ నాయకులతో కూడిన భారీ ఎస్పీ బృందం సెప్టెంబర్ 7న సహారన్పూర్ను సందర్శించాలని నిర్ణయించింది.
కోర్టు ఆదేశాల మేరకే ఆ స్థలాన్ని ప్రభుత్వ స్వాధీనం చేసుకున్నట్లు జిల్లా యంత్రాంగం చెబుతున్నప్పటికీ, మసీదు కూల్చివేత మరియు దాని కింద పురాతన బావి బయటపడిన ఈ రెండు ఘటనలు ఉత్తరప్రదేశ్ రాజకీయాల్లో తీవ్ర చర్చకు దారితీశాయి.
Leave a Reply